قصيدة روعة...........

بسم الله الرحمن الرحيم


تدرين وش يسوى النظر في عين معدوم النظر...

وتدرين وش تسوى الخطا في عين مقعد أو سريك..

هذاك يتمنى يشوف بعين وحده لو قدر..

والثاني يتمنا يقوم ولا مقام ولا حريك..

وإنتي ياعمري في حياتي عندي أغلى من البصر..

وش فايدة كل الخطا إن ماخذت رجلي إليك...

خطوات وبدون الطريق ولا الهدف صارت هدر..

يعني العمر روح هدر وأنا يا روحي أحتريك..

الشمس غابت في عيوني ولين مطلاع الفجر..

والليل كله ساهر وياي يسألني عليك..

وأقول له مرات إن الشمس يحجبها القمر..

ويقول لي لا شمس شفنا ولا القمر يمكن يجيك..

إن قلت أحبك إيه أحبك عد قطرات المطر..

وكل ماهبت شمالي قمت أقول إني أبيك..

لو ينزرع هالحب كله كان في قلبي ثمر..

لو تنشرى الأرواح والله بعت نفسي لمقلتيك..

جمعت في قلبي الكبير كل أحاسيس البشر..

وكل أحاسيس البشر ما وصلت لمست إيديك..

وبعد هذا كله تجيني ولا عندك خبر..

باللي حصل في غيبتك ما كني بحبك شريك..

ويعلم الله لو تأخرتي خفوقي في خطر..

لو زدتي غيابك دقايق كان وقف يرتجيك..

وإذا وقف قلبي بموت وأنا قتيلك يا القمر..

وما عاد ينفعك العذر والقلب ميت في يديك..